Qeveria ka marrë vendim që akciza për dizelin të ulet për 4 denarë, ndërsa për benzinën për 2 denarë, si dhe të vazhdojë TVSH-ja e ulur deri në fund të gjendjes së krizës. Këtë e bëri të ditur kryeministri Hristijan Mickoski pas përfundimit të mbledhjes së jashtëzakonshme të qeverisë.
– Po e vazhdojmë deri në fund të gjendjes së krizës masën për uljen e TVSH-së për karburantet nga 18% në 10%, ndërsa njëkohësisht kemi marrë vendim që gjatë kësaj periudhe Komisioni Rregullator për Energji të mund të ulë akcizën për dizelin me 4 denarë dhe për benzinën me 2 denarë për litër – deklaroi Mickoski, duke shtuar se pa këto masa çmimi i karburanteve do të kalonte mbi 100 denarë për litër.
Ai njoftoi gjithashtu se OKTA do të vazhdojë zbritjen e saj deri në fund të muajit prill. Sipas tij, çmimi i dizelit do të mbetet i njëjtë si deri tani, ndërsa benzina do të ketë ulje shtesë prej 2 denarësh për litër.
Mickoski theksoi se konsumi ditor i karburanteve ka arritur në rreth 2 milionë litra, ndërsa në disa pika karburanti konsumi është trefishuar për shkak të interesimit të qytetarëve nga vendet fqinje, të cilët vijnë për të furnizuar për shkak të çmimeve më të ulëta.
Ai vlerësoi se nuk ka nevojë për masa shtesë, pasi sipas bisedimeve me tregtarët e karburanteve është konfirmuar se ka furnizim të mjaftueshëm dhe konsumatorët vendas nuk do të rrezikohen.
Be First to Comment