Përfundimi i mandatit presidencial në Kosovë nuk nënkupton fundin e angazhimit institucional apo përfitimeve që lidhen me këtë pozitë. Sipas legjislacionit në fuqi, ish-kreu i shtetit gëzon një sërë të drejtash të përcaktuara qartë me ligj.
Në rastin e Vjosa Osmani, pas përfundimit të mandatit, ajo kalon në statusin e ish-Presidentes, duke përfituar mbështetje financiare dhe institucionale.
Një nga përfitimet kryesore është pensioni i përhershëm. Ligji përcakton se ish-Presidenti/ja merr 70% të pagës së fundit në këtë pozitë. Bazuar në nivelin aktual të pagës, kjo shumë llogaritet të jetë rreth 2,000 euro në muaj.
Përveç pensionit, përfshihet edhe sigurimi shëndetësor i plotë gjatë gjithë jetës, jo vetëm për ish-Presidenten, por edhe për familjen e saj. Kjo përfshin trajtime në institucionet publike dhe ato ushtarake.
Një tjetër aspekt është përdorimi i pasaportës diplomatike, e cila mbetet e vlefshme për gjithë jetën. Ndërkohë, fëmijët e saj e gëzojnë këtë të drejtë deri në moshën 18-vjeçare.
Ligji parashikon gjithashtu një periudhë tranzitore prej shtatë muajsh, gjatë së cilës ofrohet kompensim financiar për mbulimin e shpenzimeve bazë, si zyrë, staf dhe komunikim.
Edhe pas mandatit, ish-Presidentja ka të drejtë të përdorë zyrë dhe staf mbështetës për një periudhë deri në pesë vjet. Kjo mundëson vazhdimin e angazhimeve publike dhe përfaqësuese.
Sa i përket sigurisë, parashihet përcjellje zyrtare për tri vjet pas largimit nga detyra. Ndërkohë, ish-Presidentja vazhdon të ketë rol në ceremoni shtetërore dhe aktivitete zyrtare sipas protokollit.
Këto përfitime janë të përcaktuara me ligj dhe mund të ndryshohen vetëm përmes vendimeve të institucioneve përkatëse në Kosovë.
Be First to Comment