Një tanker i ngarkuar me naftë ruse u godit nga dronë në Detin e Zi, vetëm 15 milje detare larg Bosforit. Tankeri “Altura” ishte nën sanksione nga Mbretëria e Bashkuar dhe Bashkimi Evropian, por jo nga Shtetet e Bashkuara.
Sipas televizionit turk NTV, “Altura” po transportonte rreth 1 milion fuçi naftë ruse të tipit “Ural” nga Novorossiysk.
Portali turk detar Haber Denizde raportoi se pati një shpërthim në urën e komandimit të tankerit, pas së cilës uji filloi të depërtonte në dhomën e makinerisë. Deri tani nuk ka raportime për viktima apo të lënduar.
Të dhënat nga sistemet e gjurmimit tregojnë se anija ishte plotësisht e ngarkuar. Kjo e rrit më tej seriozitetin e incidentit dhe rrezikun potencial për një katastrofë mjedisore, nëse dëmet rezultojnë më të mëdha se sa është raportuar.
Kjo e vendos ngjarjen në “zonën gri” të tregtisë globale të energjisë, ku politika dhe ekonomia shpesh përplasen.
Be First to Comment